Psa 103 | TUCO | STEP | Mbouŋ to David You nasaav pa taug naghaze you irau napait Yoova pa poia toni. Onoon kat, ila lolog ve ŋgar tiou isob, you pale napait Yoova iza patabuaŋ.

aIgham 15:26, 34:7; Mbo 32:1+; 1Pe 2:24; 1Yo 1:9

b2Kor 4:16

cLu 4:18

dIgham 34:6

eRo 6:23

fMbo 57:10; Ep 3:18+

gIs 63:16, 64:7+

hMbnp 2:7, 3:18; Mbo 139:13+

iIgham 20:6; Lu 1:50

Psalms 103

Tapait Maaron pa poia toni

Mbouŋ to David

1 You nasaav pa taug naghaze you irau napait Yoova pa poia toni.
Onoon kat, ila lolog ve ŋgar tiou isob, you pale napait Yoova iza patabuaŋ.

2 Nasaav muul. You irau napait Yoova pa poia toni.
Ŋgar ve mbeb popoiadi naol to ye ighamgham di payou, irau lolog imaagh pa eta maau.
3 Ye ireu sosor tiou,
ve ipasob moroghooŋ tiou tisob. ^a

4 Ye igham mulin ghou pa mateeŋ. Tauto namaat maau.
Ye igham ghou lolog poia kat nanimale tamtoghon to tighuri inim kinik.
Pasa, ŋgar to lolo ineep tuŋia ila to tamtoghon toni ve iuluul di, ye ipatooŋa payou paam.

5 Nepooŋ tiou to taan, ye ighamgham leg mbeb popoiadi naol naol le naraua kat.
Ve igham ghou nanim paghu muul, le tapirig ivot inim tiina inimale manbog. ^b
6 Ŋgar to Yoova ighamghami, nene deŋia moghon.
Tovenen tamtoghon tisob to koiadi titatan di, ve tigham samin di, ye iyondyood padi, ve iuluul di pa pataŋani todi. ^c

7 Muuŋ, Yoova ivotia gabua ve ŋgar toni pa Mose.
Ve ipatooŋ uraat tintina toman tapiri ila yes Israela matadi.

8 Yoova lolo isamin ghiit, ve ighamgham poian ghiit.
Irau ate yabyab rikia maau.
Poia toni, nene tiina kat. Ye lolo ineep tuŋia inim toit, ve iuluul ghiit irau sawa isob. Ve moghon moghon itaghon saveeŋ toni. ^d
9 Onoon, sawa pida, ye iŋgal mataad pa sosor toit. Eemoghon igham tovene moghon moghon maau.
Ve irau ikis mbalmbali toni le mala ne maau. Ineep ris, ve isob.

10 Onoon, ighaze tagham ŋgar to iyel pa tutuuŋ toni, Maaron irau iyat sosor toit ve ighur atia pait.
Eemoghon ye ighamgham tovene maau. ^e

11 Yes to timatughez pani, ve titaghon ŋgar toni, Yoova lolo ineep tuŋia ila todi, ve poia toni tiina izaza todi itaghon saveeŋ mbuaaŋ toni.
Lolo poia tonowen, tiina kat, inimale soso to taan ve izala pa sambam. ^f

12 Ve sosor toit to tazorzoor Maaron aliŋa, nene Yoova ipaghau di tila mala kat pait,
irau soso to taan dige to ila pa ndag iza, ve ila pa ndag izila.

13 Yes to timatughez pa Yoova ve titaghon ŋgar toni, ye lolo isamin di inimale nditamaan lolodi isamin ghiit. ^g

14 Pasa, ye tau to igharaat ghiit.
Tauto moghon moghon mata iŋgalŋgal ighaze: Iit tanimale ghavuur to taan moghon. ^h

15 Nepooŋ to iit tamtoghon to taan, nene mala maau. Taneep ris, ve talaleed tanimale kikiliiŋ.
Iit tanimale kananaŋ ruŋgu. Mboŋmaagh, ighaze ndag iza, ghoro ivavaal. Ve rabrab izi, ghoro imalai.

16 Ve ighaze yaghur iviviira, nene pale itap izi, ve ina ŋginiŋa. Taghita muul maau.
17 Eemoghon yes to timatughez pa Yoova, ve titaghon ŋgar toni,
ye lolo ineep tuŋia ila todi, ve iuluul di. To aazne, ve itaghoni taghoni gha ila.
Ve ndinatudi ve nditimbudi paam. Ye ipatooŋ ŋgar deŋia padi ve iseeŋga itaghoni taghoni gha ila.
Tovenen yes to matadi kisin saveeŋ to yesŋa Maaron timbua, ve titaghon tutuuŋ toni, ye pale lolo ineep tuŋia ila todi, ve iuul di itaghoni taghoni gha ila. ⁱ
19 Yoova ighur ina to ghamuuŋ pooz ineep tuŋia izi sambam.
Ye kinik to ighamgham pooz pa mbeb tisob.
20 Tovenen yam aŋela to Yoova, yam asob apaiti pa poia toni.
Yam aŋela ariaŋamim to aloŋlooŋ Yoova aliŋa ve ataghoni, apakuri.

21 Yam ndaaba to sambam to ambesmbees pa Maaron ve ataghon ŋgar toni,
apait Yoova pa poia toni!

22 Yam mbeb to sambam ve taan to Yoova igharaat gham, ve aneep ila samba,
yam asob apaiti pa poia toni.
Ve you paam, pale napait Yoova pa poia toni.